مر كم يوم على الموضوع السابق ..بدون بحث مني على تفاصيل الأحداث تابعت بشكل نمطي حياتي المعيشيه العاديه والتى يغلب عليها الروتين من الدوام للبيت من البيت للدوام واحيان تحصل لي روحه مني مناك في وقت الفراغ ولكن الموضوع شبه تلاشى بسب انشغالي ..إلى أن تعرضت لصداع قوي ماقدرت أني اهديه بالبنادول كالعاده رحت للمستشفى وصف لي الدكتور باراستامول يعني" بندول بوطقه " !!! ضحكت وقلت للدكتور أنا علاجي اقوى من علاجكم ضحك وقال هذا الموجود يالله على الاقل امر واسلم على H مريت مالقيتها الظاهر ماكان عندها دوام يومها ..خل اروح الصيدليه وآخذ البارستامول مو عشان شي بس حرام روحتي للمستشفى تطلع على الفاضي رحت عطيت الصيدلانيه الوصفه عطتني الدواء ورجعت للبيت اريح من الصـداع نمت نومه طويله .."شفتك شفتك قلبي رجف صبري ضعف شفتك يالهفت خااطري لوني تغير وانخطف" والله لو تثور مدافع ماراح اشيل التلفون بنام يعني بنام ..بعد غفوه طويله انتبهت أن اللى داقه علي H قلت ادق واشوفها شبغت كلمتها تقول لي خير عسى ماشر اليوم انتي تعبانه !! شنو أنتي مخاويه H شدراج أني مريضه قالت أماني قالت لي ..يا هالاماني اللى مو ناقص إلا تطلع لي من الحنفيه؟؟ قالت الصيدلانيه اللى صرفت لج الدواء تقول يوم قرت اسمج عرفتج بس الظاهر أنتي ماعرفتيها !! هلا والله هلا ..حسافه حسيت وجهها مألوف بس مادققت وتذكرت يعني كانت قدامي شوف شلون الصدفه ترسم خارطة الطريق إلى اماني "عدل القريب من العين قريب من القلب"شلون لا وهي تصبح وتمسي على طلتها البهيه..طبعا سويت روحي غشيمه كالعاده وقلت لها أماني تعرفني شلون ؟؟ قالت كانت معانا بالثانوي وتعرفج من كثر ما كنا نسولف عنج أنا وعليا ..قلت لها غريبه ماعرفها !! قالت لي zozo بس عبط زين !!! وبعدين شلون ماتعرفينها وأنتي ماخذه تقرير مفصل من عليا عنها >>>> أووه والله ذبج حلال ياعليا موتج على ايدي ..ضحكت ابي اطري الجو قمت وقلت لها مو تقرير بس رؤس اقلام قاطعتني وقالت ثاني مره تبين معلومات اسأليني ضحكت وقلت لها يعني عليا خرت الأولي والتالي قالت مسكينه عليا تكلم على نيتها بس أنتي اللى كنتي تلفين وتدورين عليها هني أنا قاطعتها وقلت لها ألف وادور على شنو ؟؟ ترى ماهمتني البنت بس كنت استفسر من عليا لأنكم كنتم تعرفونها وأنا لا فحبيت أني اعرفها منو اهي ..وإذا جينا للف والدوران فمحد يلف ويدور مثلج انتي تلفين 360 ْ في الثانيه >>> طبعا قامت تضحك H وهذا اللى كانت تبيه أني اتنرفز واعصب وطلع مافي جعبتي بس حاامض على بوزها.. قالت لي ليه ماتسأليني ؟؟ قلت لها بتكونين مثل عليا وتقولين كل شي .. والا بتخشين شغلات ..ردت شغلات مثل شنو ؟؟ مثل تطبيقج للشريعه معانا ياظالمه اربعه يخرب بيتج معلقتنا أيام الثانويه وتسوين حالج مسكينه ..وتدعين الفقر يمال الفقر هههههههههاي الحين هذا اللى حارج ..قلت لا مو حارني بس كان حلو لو معلمتني قبل ..قالت لأن ماكان في شي اساساً وقتها ..طبعاً احساس الواحد لما يندقر مرير وأنا احس أني مندقره واااايد مو شوي ..فقلت يالله بااي اكلمج بعدين ...ردت شنو المانع إذا كانوا اربع وإلا عشر وإلا ميه !! إذا كانت وحده بس اللى تتم والباقي يروحون ..أنا من اللى راحوا ؟؟ قالت أنتي باقيه بس لاتنسين أنتي اللى رحتي من نفسج ..يووووووووووووه لـ متى وإحنا بنفس الدوامه !!! بداخلي ابيها وماحب غيرها وصرت اغار بزياده عليها شسوي ياربي هل هو فعلاً إبتلاء ؟! قلت لها بكل صراحة ماعدت اقدر على التمثيل ولأني قادره انسى أنج كنتي حياتي ولازلتي حياتي وإذا بكون صديقتج ماراح اقدر اجاري هالصفة على طول بيجي يوم وانفجر ..واليوم أنا خلاص ماعدت احتمل أنج تجين وتشكين لي من الحب في حياتج..وتحطين راسج على كتفي وتستندين علي ..حراام عليج أنتي تشكين لي وأنا لا بغيت اشكي منج وين اروح ؟؟ وهنا سقطت آخر ورقة من مذكره حياتي مع H تركنا بعض ..تركت صديقتي وحبيبتي وانقذت مايمكن انقاذه من قلب محطم حطمته أول مره بحب غير مشروع وثاني مره برجوع علاقة فاشله كنت متأمله ننجح فيها كصديقات لكن.. وثالث مره بفقدان أعز صديقه ..
من كتاباتي السابقه التى لها علاقه بالموضوع ..
هاقد عدت من حيث بدءت
تائهه في طريقي لا اعرف اتجاه
وبدءت أسئلة الحيره تطرق بابي
فهـل اجاوبها بعدم الإكتراث !!
أم اقول حقيقة أني تمنيت
فوجدت الأماني مستحيله
حلمت ..فقالوا الحلم حراام
من أين ابدء آهاتي الحزينه
كيف ابدء وقد اصبحت
حطام..
من ينتشلني من هذه الضيقه
من يوصلني إلى بر الأمان؟؟؟
ها قد عدت ادراجي بجسد
لا قلب ولا روح فيه
ولا شي غير الجراح يحويه ..
ونسيت في عزائك أن اعزيه
عل حبك الطاهر الذي يفنيه..
