حيــاه جديدهـ
بعد تخرجي وحصولي على وظيفة انتهت مراحلي الدراسيه وبدت مرحلة جديده (أنا اسميها مرحلة الاقبال على الحياه) انقلبت معاها حياتي فوق تحت عرفت ناس وايد فيهم الزين وفيهم الشين وفيهم اللى يبطن خلاف مايظهر يعني اللى في قلبه شي وبكلامه معاك شي ثاني يعني عرفت نفسيات مايعلم فيها إلا الله ولكن إذا عرف السبب بطل العجب كانت معاي بالدوام شله تسمى شلة الأنس سوالف بنات وحش ناس احس أن الله ابتلاهم بحب مراقبة غيرهم ..فلانه شنو لابسه جنها حيزبونه ..علانه شمسويها بحواجبها جنها مساحات تنكر ..فلانه ماتزوجت ليش ؟؟ علانه تطلقت ليش؟ شفتي زوج فلانه واااي شحلاته مو لايق على الباصقه !! طاح حظي ريلي مشوهب وشكله مجثي وفوق هذا مايدفع لي قيمة مكالماتي !!! بــــــــــــــــــــــس ..ماهي إلا صرخه مني توقعت أنهم سمعوها لكن ايقنت بعد ذلك أني كنت اصرخ بداخلي وهم لازال التحلطم سائد على اجوائهم ... يوميا هذا حالي مع هذه الشله النكره التي حفظت عن ظهر قلب نواياهم وعرفت انهم منافقين بشكل غير طبيعي اتوقع والعلم عند الله أن الكافر مسلم أكثر منهم ..
كلمت صديقتي H عن هالنوعيه وقلت كنت اتوقع القى صديقات مثل طقتج وطقة عليا ..ضحكت وقالت هذا اللى قلته لج من قبل يوم قلت ابي وحده تحس فيني تعرفني من قبل لا اتكلم احتاج صداقتج فاقدتها حيل إلحين صداقات الناس بس مصالح تذكرين وقتها شرديتي علي ؟؟وشنو كان موقفج يامسلمه والعالم كله كافر ؟؟ قلت لها إيه وضحكت ..لأن بالفعل كانت تحاول أنها تحتفظ بصداقتنا على كثر ماتقدر فقبلت أنها تتناسى اللى صار بينا من حب ونتم صديقات لكن من زود ذكائي الخارق وتشددي بالدين بشكل مبالغ فما عندي حل وسط يا ابيض يا اسود ..اخترت الفراق على أني اتم معاها ..وبالفتره هذه أنا اللى بالفعل خسرتها مو اهي ..المهم وأنا اكلمها كل شوي تقول معاي خط ثاني ..لحظه وارد وبالفعل مجرد دقيقه أو دقيقتين وترد تكلمني بصراحه ماعرفت اكلمها عدل من كثر هالاتصالات.>> اخاف وزيره وأنا مدري.. المهم قلت لها ترى باجر معزومه أنتي وعليا على العشى من زمان ما تجمعنا وأي مكان تختارونه أنا حاضره ومن عيوني ..
موعد على العشى ..
مريت صديقتي عليا ورحنا المطعم وبعدنا بفتره بسيط شرفت الست H ..المهم قعدنا نسولف على كل شي استرجعنا الماضي والحاضر وحنا قاعدين ناكل تلفون H ماسكت طبعا غير المسجات اللى اشخلتنا كل دقيقتين قلت لها شنو وضعج بالوزاره لا يكون حطوج بدال هلال الساير وأنا ماعندي خبر ...طالعتني جان تقول اهم ..ههههههههههههههههه اضحكتني طريقتها حسيتها تستعبط علي وأنا على قولة السوريين الفار بدء يلعب بعبي إلا مو فار ..قطو ...بعد ماقررت أنها ترد قالت : ألو ..هلا الحب >>>> جتني ضحكه وبالوقت ذاته جنه احط طاقني طراق ..التفت صوب عليا طالعتني وابتسمت ابتسامه خفيفه وقالت سلمي لي عليها من زمااان ما شفتها >>> لا مو معقوله هذا الطراق الثاني في هالأمسيه الزرقه وبكل ثقل سألت عليا منو هذه ؟ قالت هذه أماني حبيبت H >>> لا كاااافي هذا ثالث طراق حرام عليكم اللى انصدمت منه أن عليا تدري أن H تحب البنات مع العلم أنها ماتدري أن أنا و H كنا نحب بعض وكل اللى كان في بالها أن إحنا رفايج من الصغر ..وعليا من النوع اللى ماتحب رفايجها يكونون ليزبيان ..ودايم تنتقدهم وحنا ماكنا مبين لها هالشي !!! شلون إلحين إهي راضيه لا وتعرفها بعد ..قالت لي عليا انصدمتي أن H ليزبيان مو >>> هههههههه ضحكت عليا وأنا احاول اجاريها واضحك معاها وبداخلي قاعده احاتي أن H قايلتلها عني قامت عليا تغسل ايدينها استلمت H قلت لها أنتي قايله شي عنا حق عليا قالت شي مثل شنو ؟؟ قلت يعني عن اللى بينا قبل ..قالت لا تطمني قلت لها شلون هي مريحه على هالوضع ؟!قالت لا بس تكلمت أنا وياها وايد وخذت فتره طويله على ما استوعبتني وإلحين عادي تقبلت هالشي ..وبصراحه هي درت أني ليز من كثر ما لجأت واشتكت لها عن اللى يصير في حياتي وأني أميل للبنات عقب ما تركنا بعض هي الوحيده اللى حسيت أنها ممكن تفهمني عقبج ..ردت عليا وكملنا سهرتنا وأنا بداخلي منو أماني ؟؟؟
